Navenda Nûçeyan – Tevgera Jinên Azad (TJA) derbarê serdanên Dayîkên Aştiyê ya bi partiyên siyasî yên li Enqerê de daxuyaniyek nivîskî weşand. Di daxuyaniyê de peyama “Em hêvî dikin bingeha diyalogan xurt bibe” hat dayin. 

Di dewama daxuyaniyê de ev tişt hate gotin:

Avakirina pêşerojek demokratîk

“Em bawer dikin ku hevdîtinên me ji bo pêvajoya Aştî û Civaka Demokratîk girîng û bi hêvî derbas bûne. Daxwazên me yên bingehîn ên ku me di dema hevdîtinan de anîne ziman ev in: Avêtina gavên siyasî û hiqûqî. Destpêkirina ‘mafê hêviyê’ (derfeta berdana bi şert) ji bo Abdullah Ocalan ku di girtîgehê de girtî ye; me ev wekî mecbûriyeke hiqûqî û perçeyek ji pêvajoya aştiyê daxwaz kir. Avakirina pêşerojeke demokratîk ku êdî tu dayîk negrîn, tu ciwan nekevin binê axê û gel di jiyaneke wekhev, azad û bi rûmet de bigihêjin hev. Em wek dayîk difikirin ku aştiyeke birûmet û mayînde ne tenê ji bo herêmekê, ji bo 86 milyon mirovên ku li Tirkiyeyê dijîn nebenabe ye.

‘Em dixwazin rêyên diyalogê bên vekirin’

Wek dayîkên ku bi salan e êşên polîtîkayên şer kişandine, bi êşa keç û kurên xwe hatine cezakirin lê dest ji jiyan û aştiyê bernedane; em dixwazin rêyên diyalogê bên vekirin, zemîna çareseriya demokratîk xurttir bibe û astengiyên li pêşiya rêyên hevdîtinê bên rakirin. Di dema ber bi Roja Dayîkan de, hestiyarî û îradeya çareseriyê ya ku me ji beşên cuda yên civakê dît, di dilê me dayîkan de bûye hêvî.

‘Şer herî zêde birînê di jiyana jinan de vedike’

Em jin û dayîk dizanin ku şer herî zêde birînê di jiyana jinan de vedike. Ji ber vê yekê parastina aştiyê, di heman demê de parastina jiyan, wekhevî û pêşeroja azad e. Em bawer dikin ku têkoşîna ku bi keda jinan û bi biryardariya dayîkan a ji bo aştiyê mezin dibe, dê ji bo jiyana hevpar a gelan zemîneke bi hêz ava bike. Di vê çarçoveyê de me di hevdîtinan de diyar kir ku daxwazên me yên hevdîtina bi birêz serokkomar, birêz Devlet Bahçelî û Birêz Abdullah Ocalan re hîn jî derbasdar e. Em dayîk, ji bo pêşketina aştî û çareseriyê, daxwaza vekirina rêyên hevdîtinê û xurtkirina zemînên diyalogê dikin. Di vê pêvajoyê de em spasiya DEM Partiyê û her kesê ku keda wan heye dikin ku em bi tenê nehiştin, piştgiriya me mezin kirin û di pêkhatina hevdîtinan de roleke hêsankar lîstin. Em wek Dayîkên Aştiyê; dê li dijî şer jiyanê, li dijî înkarê rastiyê û li dijî tunnehesibandinê xwişk û biratiya gelan biparêzin. Em baweriya xwe ya ku civaka demokratîk û aştiya birûmet dê bi pêşengiya jinan mezintir bibe, diparêzin.

Jin Jiyan Azadî.”