Navenda Nûçeyan – Sînorkirinên li ser jinan li Efganistanê roj bi roj tundtir dibin. Li gorî raporek ku di 29’ê Tebaxa 2024’an de di rojnameya The Guardian de hatiye weşandin, Talîbanê xwestiye porçêkerên (kuafor) jinan ên ku bi dizî li malan dixebitin bê tespîtkirin û ji rayedaran re were ragihandin. Wezareta Fermankirina Maf û Qedexekirina Xerabiyê ya Talîbanê ji porçêkerên jinan re tavilê ferman daye ku xebatên xwe rawestînin û hişyarî daye wan ku eger ew nekin ew ê werin girtin.

12 hezar porçêker hebûn

Di sala 2023’an de, Talîbanê hemû salonên porê jinan ên li welêt girtin û lîsansên karsaziya wan betal kirin. Heta wê demê, li Efganistanê nêzîkî 12 hezar salonên por çêkirinê hebûn, û zêdetirî 50 hezar jin di vê sektorê de dixebitin da ku debara xwe bikin. Piştî qedexeyê, gelek salonên porê ji bo debara xwe bi awayekî veşartî xerîdarên ji malan qebûl kirin. Lêbelê, ev  biryara nû armanc dike ku xebatên jinan ên veşartî jî bi dawî bike.

Her dem qedexeyên nû tên

Di heman demê de, endamên "Wezareta Fermankirina Maf û Qedexekirina Xerabiyê" ya Talîbanê êrîşî çend dibistanên taybet kirin û keç bi zorê ji dibistanê derxistin. Li gorî agahiyan, li parêzgeha Herat a Efganistanê, endamên Talîbanê ji rêveberê dibistanekê re gotine ku divê jin û keç li malê bimînin. Talîbanê qedexe kir ku keç ji pola şeşan pê ve perwerdehiyê bibînin. Komê pêşî dibistanên keçan, paşê zanîngeh û di dawiyê de saziyên bijîşkî girtin.