Navenda Nûçeyan – Tomara dengê xwendekara girtî Parîsa Kamalî ji girtîgehê derket. Di tomarê de, ew bi tundî rewşa heyî ya pergala dadweriyê û miameleyên li dijî xwepêşanderan rexne dike. Ev peyam ku tevî dengê hişyariya telefona girtîgehê hatiye tomarkirin, li ser tora dijîtal deng veda û rewşa girtiyên siyasî û zêdebûna cezayên îdamê dîsa anî rojevê.

"Mirov ji dîtina sûcên bêdawî ditirse"

Parîsa Kamalî di vê tomara dengî de bi zimanekî rexnegir şert û mercên girtîgehê û krîza kûr a pergala dadweriyê tîne ziman. Kamalî balê dikişîne ser rewşa heyî û dibêje: "Li vir, hikûmdarên kartonî serdest in; ev cihekî weha ye ku mirov ji dîtina sûcên bêdawî ditirse."

Xwendekara girtî di berdewamiya axaftina xwe de diyar dike ku nêzîkatiya li hemberî girtî û xwepêşanderan li ser bingeha tepeserkirinê ye û nebûna pêvajoyên dadwerî yên zelal rexne dike.

"Rojek bêyî darvekirin derbas nabe"

Beşekî din ê peyamê balê dikişîne ser darvekirin û polîtîkayên ewlehiyê. Kamalî di vê beşê de bi gotinên tund feryada xwe tîne ser ziman û dibêje: "Ew bi gule û çengelê bersivê didin qîrînan. Rojek jî bêyî darvekirinê derbas nabe, bêyî ku mirovek were kuştin."

Van gotinan li ser tora dîjîtal deng vedaye û di nav bikarhêner û parêzvanên mafên mirovan de bertekên mezin derxistine holê.

Li ser tora dijîtal deng veda

Belavbûna vê tomara deng ya dîjîtal bala gelek kesan kişand; bi taybetî ji ber ku ji hundirê girtîgehê hatiye tomarkirin û tê de peyama hişyariyê ya otomatîk tê bihistin. Gelek bikarhêneran ev yek wekî delîlekî zextên berdewam ên li ser girtiyên siyasî û binpêkirina azadiya ramanê nirxand.