Şengal – Di çarçoveya xebatên 4’ê Nîsanê Roja Rojbûna Rêberê Gelê Kurd Abdullah Ocalan de ji aliyê Jinên Ciwan ên Şengalê ve li Şehîdgeha Şehîd Dilgeş û Şehîd Berxwedan semîner hat dayîn.

Di axaftinên semînerê de 4’ê Nîsanê li Ocalan û hemû gelan hat pîrozkirin û hat gotin ku dê ji bo rojbûna Abdullah Ocalan her derê dar biçînin. Her wiha di semînerê de îşaret bi peyama Ocalan a ji civaka Êzidî re şandibû hat kirin û hat destnîşankirin ku bi peyama Ocalan ji hêla civaka Êzidî ve bi kelecaneke mezin hatiye pêşwazîkirin.

Piştî semînerê bi pêşengiya jinên ciwan li ser gorên pakrewanan gul hatin çandin.

Jinên ciwan ên tev li semînerê bibûn, ji ajansa me re axivîn.

Endama Jinên Ciwan Jiyan Şengalî diyar kir ku ji bo 4’ê Nîsanê ew gul û çîçekan diçînin û wiha got: “Ji ber Rêbertî her dibêje di rojbûna min de dar û gulan biçînin bi vê armancî em jî ji bo çandina gul û çîçekan hatin şehîdgehê. Em 4’ê Nîsanê di serî de li Rêber Apo û hemû gelan pîroz dikin.”

‘Dê îsal 4’ê Nîsanê hîn bi coştir were pîrozkirin’

Bêrîvan Argeş jî destnîşan kir ku ji ber peyama Abdullah Ocalan a ji bo civaka Êzidî dê îsal 4’ê Nîsanê hîn bi coştir û xweştir be û ev tişt anî ziman: “Bi boneya 4’ê Nîsanê rojbûna Rêber Apo me li ser gorên şehîdên xwe gul çandin. Em weke civaka êzidî û hem jî wek jinên ciwan silavên xwe ji Şengalê heta Îmraliyê ji Rêber Apo re dişînin û 4’ê Nîsanê lê pîroz dikim. Dê îsal 4’ê Nîsanê hîn bi coştir were pîrozkirin. Ez 4’ê Nîsanê li Rêber Apo, li civaka Êzidî û hemû gelan pîroz dikim.”

Peyama Abdullah Ocalan hat nîqaşkirin

Her wiha li Meclisa Gel ya Şengalê jî semînerek hat dayîn. Semîner ji aliyê berdevka Meclisa Jin ya Şengalê Emşê Korkorkî û Berdevka Dîplomasiya TAJÊ Sûham Şengalî ve hate birêvebirin. Di semînerê de nameya Rêberê Gelê Kurd Abdullah Ocalan ji aliyê Suham Şengalî ve hate xwendin. Piştre nîqaş li ser peyama wî ya ji bo civaka Êzidî hat meşandin.

Berdevka Meclisa Til Ezêr a Şengalê Filûz Îlyas a beşdarî nîqaşan bûbû wiha nêrînên xwe parve kir: “Bi nameya Rêber Apo em kêfxweş bûn. Her dem bi me difikire, çi ji destê me were em ê ji bo Rêberê xwe bikin. Ez rojbûna Rêber Apo li her kesî pîroz dikim û bi taybet li dayikan ez pîroz dikim. Rêber Apo dibêje bila Êzidî bibin yek û axa xwe biparêzin. Ev peyam cihê hêzê ye ji bo me. Em piştrast in, ji ber ku em dizanin Rêber Apo li pişta me ye. Armanca me azadiya fîzîkî ya Rêber Apo ye dê têkoşîna me lji bo vê bidome. Rojbûna Rêber Apo rojbûna me jinan e, Rêber Apo di dilê me de ye. Em 4’ê Nîsanê li her kesî pîroz dikin û her kesî dewetî şahiya 4’ê Nîsanê dikin.”