Navenda Nûçeyan – Kombûna Jinan a Zenûbiya ya Bakur û Rojhilatê Sûriyeyê têkildarî bernameya nû ya perwerdeyê ku ji aliyê hikûmeta demkî ya Sûriyeyê ve hat danîn daxuyaniyek da.  

Kombûna Jinan a Zenûbiya diyar kir ku guhertinên di bernameya perwerdeyê de, li dijî dîroka Sûriyeyê ye û rola jinan a di avakirina şaristaniyan de tê rakirin. Her wiha bal hat kişandin ku pirsgirêk ne tenê pirsgirêka perwerdeyê ye, ya tevahiya civakê ye û mijar pêşeroja nifşên nû ye.

‘Jibîrkirin û windakirina dîroka Sûriyeyê ye’

Kombûna Jinan a Zenûbiya îro daxuyaniyek der barê şermezarkirina guhertinên ku di bernameyên perwerdeyê yên hikumeta demkî ya Sûriyeyê de hatine çêkirin, da. Di daxuyaniyê de wiha hat gotin: “Em bertekek tund li dijî guhertinên dawî yên di bernameya perwerdeyê de ji hêla wezîrê nû yê perwerdeyê ve di hikumeta demkî ya Sûriyeyê de, raber dikin. Ev yek çand û dîroka me tune dike û rola jinan di avakirina şaristaniyan de diçewisîne. Di vê guhertinê de rol û navê jinên pêşeng ên Sûriyeyê di nav de Melîka Zenûbiya ku sembola îsrar û berxwedanê bû, tê rakirin. Ev ne tenê jibêrkirina hinek navan e, jibîrkirin û windakirina dîroka Sûriyeyê ye.”

‘Ev guhertin dijberî hebûna çandî hunerî û mezhebên civakan in’

Di berdewamiya daxuyaniyê de Kombûna Jinan a Zenûbiya helwesta xwe li hemberî guhertinên ku tên kirin û tunekirina rola jinan nîşan da û wiha hat gotin: “Jin di avakirina civakan û pêşxistina wan de roleke mezin lîstine û hê jî dilîzin. Jinan roleke girîng di hemû warên jiyanê de, ji aborî bigre heya çand û hunerê lîstine. Tu hêz di cîhanê de nikare hebûn û rola jinan înkar bike. Her wiha ev guhertin dijberî hebûna çandî û hunerî û mezhebên di nava civakê de ye. Divê fêrkirin û perwede li ser hemû mezheb û olên ku di nava civakê de cih digirin, bê meşandin. Em tu carî nahêlin rola jinan di dîrok û civakan de bê çewisandin. Em bang li rayedarên eleqedar dikin ku bi lez van guhertinan sererast bikin. Careke din bernameyên perwerdeyê yên ku di wan de rol û hebûna jinan hene û wekheviyê di nava civakan de ava dikin, saz bikin.”

Bang li rewşenbîr û kesên xwedî rol û rist hat kirin ku li dijî vê yekê bisekinin

Kombûna Jinan a Zenûbiya di dawiya daxuyaniyê de bang li hemû rewşenbîr, rojnamevan û kesên zana kir ku li dijî van guhertinan bêdeng nemînin û li hemberî tunekirina nasname û mîrasa xwe xwedî sekn bin û wiha bi dawî kir: “Em di wê baweriyê de ne ku bi hev re û bi destekî em ê li hemberî êrişên tunekirinê yên li ser çand û mîrasa civaka xwe bisekinin. Em ê parastina hebûna xwe bikin û pêşerojek baş ava bikin. Em piştevaniya hemû jinên ku ji bo azadî û mafên xwe têdikoşin, dikin. Em dengê xwe li hemberî zordariyê bilind dikin û ji bo avakirina pêşerojeke ronî dixebitin.”