Navenda Nûçeyan – Serhildana “Jin, jiyan, azadî” ku li Îran û Rojhelatê Kurdistanê piştî Jîna Emînî di 16’ê Îlonê de ji ber îşkenceya polîsên exlaqê jiyana xwe ji dest da, destpê kiribû, didome. Gelek çalakvan û welatî tên girtin, çalakger tên qetilkirin û revandin. Li gel ku ev hefteyek e tu agahî ji Armîta Abbasî nayê girtin, dozgeriyê li xwe mikur hat ku ew duh hatiye girtin û wê birine girtîgehê.

Hat parvekirin ku di çalakiyan de Armîta Abbasî birîndar bûye û rakirin nexweşxaneyê, lê piştî nexweşxaneyê tu xeber jê nehatiye. Li ser lêgerîna malbat û xizmên Armîta Abbasî jî rayedar li ser vê yekê bêdeng man. Duh jî Serdozgeriya Komarê ya Alborzê, ragihand ku Armîta Abbasî girtî ye.

Serdozgeriyê nûçeya êrîşa zayendî derewand û diyar kir ku ew rakirine nexweşxaneyê û piştre hatiye girtin.

Her wiha hat hînbûn ku Armîta Abbasî ku bi hinceta parvekirinên xwe yên li ser medyaya dîjîtal hat girtin, bi sûcên "çêkirin û avêtina molotofkokteylan", "li cîhana sîber weşandina naverokên provokatîf" û "teşwîqkirina serhildanê" tê sûcdarkirin.

Malbata Armîta Abbasî 8 roj in agahî jê nayê girtin û dozgeriyê jî îdia kir ku malbat agahdar bûye.