Amed – Konferansa Jinan a Rêveberiya Xwecihî ya Amedê, bi dirûşmeya “Em bi vîna jinan û komûnan, bi rêveberiyên xwecihî civaka azad ava dikin” li Salona Alî Emîrî ya Bajarê Mezin a Amedê hat lidarxistin. Gelek hevşaredar û endamên meclîsan bi cil û bergên neteweyî beşdarî konferansê bûn. Endama Desteya Navendî ya Rêveberiyên Xwecihî ya DEM Partiyê Gulistan Atasoy piştî deqeyek rêzgirtinê, axivî.

‘Em ê bi hev re paşerojek azad ava bikin’

Gulistan balkişand ser armanca konferansê û da zanîn ku ji bo avakirina şêwazek jiyana komunal hatiye lidarxistin. Gulistan wiha got: “Îro, em hevrêyên xwe yên ku di têkoşîna ji bo rêveberiya herêmî de jiyana xwe ji dest dane û yên ku li girtîgeh û sirgûniyê têkoşiyane, bi bîr tînin. Em ê bi hev re paşerojek azad ava bikin. Me pêvajoyek girîng ji hilbijartinên 31’ê Adarê vir ve li dû xwe hişt. Yek ji xalên sereke yên têkoşîna azadiya jinan rêveberiyên herêmî ne. Em bi vê berpirsiyariya xwe ve xebatên xwe didomînin.”

‘Me li ser bingeha prensîba beşdarbûnê amadekariyên konferansê kir’

Gulistan da zanîn ku vîna jinan di 31’ê Adarê de hêza xwe nîşan daye û wiha pê de çû: “Êrîşeke dijwar li dijî vîna jinan heye. Lê belê, jin rêxistina xwe xurt dikin û li dijî vê yekê bi israr radiwestin. Me li ser bingeha prensîba beşdarbûnê amadekariyên konferansê kir. Em xebatên xwe li ser bingeha rexne û rexnedayînê dimeşînin. Hevdîtina bi paradîgmayê çiqas mezintir be, em ê ewqas xurttir bibin. Eger em ji paradîgmayê dûr bikevin, em ê bikevin nav xefika pergala kapîtalîst.”

‘Em ê bi hev re rêxistinên komûnal ava bikin’

Gulistan ragihand ku di vê konferansê de pêvajoya ku ji hêla Rêberê Gelê Kurd Abdullah Ocalan ve hatiye destpêkirin jî hatiye nîqaşkirin û girîngiya wê hatiye destnîşankirin. Gulistan li ser rojeva konferansê ev agahî dan: “Rojeva me ew bû ku em xebata xwe li ser bingeha têgeha komûnan bimeşînin û bi cih bînin. Em ê bi hev re rêxistinên komûnal ava bikin û di avakirina paradîgmayê de roleke pêşeng bilîzin. Em ê ji vê konferansê xurttir derkevin û bêhtir li ser lêkolînên jinan bisekinin. Wek jin, em ê bi aqilê kolektîf hewlên xwe yên rêxistinkirî ber bi serketinê ve bibin."

Konferans ji çapemeniyê re girtî dewam dike.