Qamişlo – Di 12’ê Tebaxê de bi pêşengtiya Hêzên Parastina Civakî HPC-Jin li dijî êrîşên dewleta tirk a li ser Bakur û Rojhilatê Sûriyeyê, di bin dirûşmeya “Kanî dadmendiya we, em cîhanê vedixwînin wijdan û dadmendiyê” li pêşiya NY ya li bajarê Qamişlo- Bakur û Rojhilatê Sûriyeyê konê çalakiyê vedan. Çalakiya konvedanê di roja xwe ya 4’emîn de didome, şêniyên Kantona Hesekê jî berê xwe dan konê û beşdarî çalakiyê bûn.

Der barê vê mijarê de, Lorîn Xelef ji bajarê Hesekê - Bakur û Rojhilatê Sûriyeyê ku beşdarî çalakiya konvedanê bûye, ji ajansa me re axivî.

“Daxwaz û doza me yek e”

Lorîn Xelef destnîşan kir ku daxwaz û doza wan yek e û got: “Em wekî tevahî jinên Bakur û Rojhilatê Sûriyeyê piştgiriyê didin vê çalakiyê, ji ber ku doz û daxwaza me yek e. Destekdayîna me ji hev re di vê demê de girîng û bi wate ye. Eger em hemû bi yek helwest tevnegerin dê dijmin me tune bike, lewra em ê hemû bi hev re têkoşîn bikin li pêşiya van êrişên hov û em li vir in heya ku heqî bi ser bikeve.”

“Komkujiyên tên kirin şerma mirovahiyê ye”

Lorîn Xelef eşkere kir qetilkirina gelê bêguneh şermek e tevahî mirovahiyê ye û wiha bi dawî kir: “Şeva borî careke din Navçeya Amûdê û gundewarên wê hat bombebarankirin, her wiha îro ji saetên sibê de bajarê Kobanê û gundewarên wê tên topbarankirin û di encamê de zarokekî 11 salî jiyana xwe ji dest da û 3 welatî jî birîndar bûn. Zarok, jin, mêr, kal û pîr li ber çavan tên qetilkirin ev şermeke herî mezin a mirovahiyê ye.”