Navenda Nûçeyan – Ebdulqadir Xarkuyî ku welatiyê Belûc ê 30 salî ye, dema bi malbata xwe re di hundirê wesayîtê de li benda kontrola ketina navçeya Mehrizê ya parêzgeha Yezdê bû, rastî gulebarana yekîneyên leşkerî hat. Di encama gulebaranê de Ebdulqadir Xarkuyî can da, hevjîna wî û du keçên wî yên cêwî yên 10 salî bi giranî birîndar bûn.

Li gorî raporên ku ji aliyê Tora Belgeyên Mafên Mirovan a Belûcistanê û Haalvsh ve hatine weşandin, ev bûyer êvara Pêncşemê çêbûye. Bûyer di raporan de wiha hat vegotin: “Dema ku ev malbat bi otomobîla Peugeot 405 ji Zahîdanê ber bi cihê nîştecêbûna xwe ya li Yezdê ve diçû, hêzên leşkerî yên li benda kontrolê ya ketina Mehrizê bicîh bûbûn, otomobîla wan gulebaran kirin. Gulebaran bêyî hişyarî û fermana ‘raweste’ hatine kirin û di encamê de otomobîla malbatê ji rê derketiye û qelibiye. Ebdulqadir Xarkuyî di encama nêzî 15 guleyên li bedena wî hatin reşandin de bi giranî birîndar bû. Piştî veguhestina ji bo nexweşxaneya Mehrizê, duh mir. Hevjîna Ebdulqadir Xarkuyî Meryem Gurgîc a 28 salî û du keçên wan yên cêwî bi navên Melîka û Sarîna (her du jî 10 salî ne) birîndar bûn. Her sê kes jî ji ber giraniya birînên xwe, di beşa lênêrîna giran de tên dermankirin.”