“Keştî dê zû yan dereng bigihîje cihê xwe”
Malbata Şenyaşar di roja 540’emîn a nobeta xwe ya edaletê de, têkoşîna xwe şiband keştiyeke edaletê ya diçe û wiha got: “Keştî wê zû yan dereng bigihîje cihê xwe.”
Riha - Nobeta Edaletê ya Emîne Şenyaşar û lawê wê Ferît Şenyaşar li pêş Edliyeya Rihayê dane destpêkirin di roja xwe ya 540’emîn de ye.
Malbata Şenyaşar ji ber girtina saziyên fermî ji ber 30’ê tebaxê, nobeta xwe li mala xwe ya li navçeya Pirsûsê didomîne.
Malbatê li ser hesabê xwe yê medyaya civakî wêneyê Emîne Şenyaşar a di bin dorpêça polîsan de hatiye kişandin etîket kir û ev parve kir: “Li erdnîgariyeke ku edalet lê kêm tê bicihanîn, mafdarî têr nake. Ya girîng ew e ku mirov mafdariya xwe ji mirovan re vebêje. Dayikê soz daye ku dengê xwe ragihîne her kesê. Ev têkoşîn keştiyeke edaletê ye ku 500 roj in diçe. Keştî wê zû yan dereng bigihîje cihê xwe.”