NAGHAM KARAJEH

Xeza- Di dema êrîşên Îsraîlê yên li ser Xezayê di meha xwe ya 10’emîn de berdewam dikin, yên ku di nava vî şerî de dijîn, ji bo têkoşîna li dijî vê êş û zehmetiyan rêbazên cuda pêş dixin. Huner ji bo jin û zarokan di van şert û mercên şer de xwe îfade bikin û dengê xwe bidin bihîstin amûrek girîng e. Wênesaz Remah El Amûdî, di wê baweriyê de ye ku huner zimanekî gerdûnî ye ku dikare sînoran derbas bike.

Bi hunera xwe balê dikşîne bandora şer

Remah El Amûdî di destpêka axaftina xwe de diyar kir ku ew dikare bi rêya hunerê dengê xwe bigihînin cîhanê û wiha got: “Ez dixwazim cîhan tevahî bibîne em çi li vê derê jiyan dikin û êşên me hîs bikin. Xeza ne tenê demografiyeke şer e lê belê ew cih û warê xelkên bi xewn û xeyal in. Mafê wan e jî bi aşîtî bijîn.  Huner li Xezayê roleke aktîv di belgekirina bûyeran de dilîze û rastiyê derdixe. Hunermendên jin jî beşek ji vê hunerê ne ku dixwazin nerîna kêm a li jinan li Xezayê bugherînin. Ez dixwazin bi riya xêzên xwe aliyên mirovî di şerê dijwar û berdewam de derxim û balê nikşînim ser aliyên herî zirardîtî bi taybet zarokên ku dibin qurbana şer û nakokiyan.”

‘Ez di hunera xwe de bi israr im’

Remah El Amûdî  di berdevamiya axaftina xwe de destnîşan kir ku ji ber her cîhê Xezayê ji sedî 85 hatiye ruxandin di dîtina diwaran de zehmetî dibîne û wiha gotinê xwe domand: “Dîwarên saxlem jî nayên peydakirin. Gelek caran li dîwarên dibistan û kolanan digerim ji bo hunera xwe berdewam bikim. Li aliyê din jî rewşa madî û peydakirina alavên hunerî jî li pêşiya min dibin asteng. Tevî van hemuyan jî ez di hunera xwe de bi israr im û li hember rewşa heyî disekinim. Ez neçar im di bin tava rojê ya tûj de xêz bikim, ev jî karê min hîn zehmettir dike û min di aliyê fîzîkî de diwestîne. Lê belê ev rewş min hîn bi isrartir dike ku ez berdewam bikim û deng û nameya xwe ji cîhanê re ragihînim.”

‘Wêneyên li ser diwaran çîrokên xelkên Xezayê dibêjin’

Remah El Amûdî got ku ew ji bo zarokan dixwaze atmosferekê peyda bike ku bikaribin hestên xwe bi afrînerî derxînin û karibin bi her kesî re danûstandinê bikin û wiha pê de çû: “ Wênexêzî ne tenê çalakiyeke hunerî ye ew awayeke dermankirina derûnî ye jî.”

Remah El Amûdî di wêneya xwe ya dawî de mijara zaroktiyê girtiye dest. Keçeke ku nepoxên rengbireng rakiriye û yek yek bi ezmanan berdide xêz kiriye. Ev wêne der barê wendakirina zarokan ji mafên wan ên herî biçûk e.

Her wiha beriya niha wêneyek li ser dîwarekî çêkir ku hejmarek jin radihêjin nan rûyê wan mest e. ev wêne derbarê berxwedaniya jinên Filistînî ye ku di hemû rewşên aborî û zextên rojane de gepa nan ji zarokên xwe re peyda dikin.

Remah El Amûdî di dawiyê de got: "Wêneyên li ser dîwaran ne tenê xêz in lê belê ew dengê rastiya bi êş in û çîrokên xelkên Xezayê dibêjin.”