Navenda Nûçeyan – Fermandariya Giştî ya YPJ’ê bi wesîleya 12’emîn salvegera damezirandina xwe daxuyaniyeke nivîskî weşand.

Di daxuyaniya Fermandariya Giştî ya YPJ’ê de wiha hat gotin:

“Di vê roja watedar de em tevahî şehîdên YPJ’ê yên qehreman bi hurmet û minetdariyeke mezin bi bîr tînin û soza bilindkirina têkoşînê nû dikin. Şehîdên me yên wêrek ji bo welat û gelê xwe bi awayekî fedayî, bi berxwedan bûn sembola têkoşîna serxwebûn û azadiyê. Nirxa herî mezin a ku weke mîras diyarî me kirin, li ser van xakan mafê jiyana azad e. Şehîdên me hêz û rûmeta me ne. Bîranîna wan her dem di dilê me de zindî ye.

Bi wesîleya vê roja watedar em tevahî şervanên wêrek ên YPJ’ê yên enternasyonal ku ji sala 2013’yan ve heya niha li hemberî hêzên çete û dagirker li ber xwe didin û şerê azadiyê didin meşandin bi serbilindiyeke mezin silav dikin.

Her wiha em bi hêrseke mezin bermahiyên DAIŞ’ê ku di 27’ê Mijdara 2024’an de di pêşengiya HTŞ’ê de bi îdiaya ku ew li dijî rejîma Baasê ne derbe pêk anîn û bi vê hincetê her kesê li pêşiya xwe qetil kirin û bi taybetî li dijî gelê me yê Elewî sûcên dijmirovî kirin, şermezar dikin.

Têkoşîna me ya bê rawestan ji bo jinên Sûriyeyê û tevahî jinên cîhanê bû rênîşanek. YPJ’ê azadiya tevahî gelan parast û heya roja me ya îro ji bo tevahî jinan, gelan û mirovahiyê dibe çavkaniya hêz û îlhamê.

YPJ, di sala 2013’yan de weke perçeyek ji têkoşîna azadiya jinê li Rojavayê Kurdistanê hat damezirandin û di nava demeke kin de bi berxwedana xwe ya li dijî çeteyên DAIŞ’ê li tevahî dinyayê deng veda. Ev berxwedana bêhempa ya li dijî hovîtiya DAIŞ’ê ne tenê şerekî leşkerî bû, di heman demê şerê azadî, nasname û rûmeta jinan bû. YPJ ne tenê li Rojava, li tevahî cîhanê bû sembola têkoşîna berxwedan û azadiya jinan. Ev berxwedan ne tenê ji bo jin û gelên Rojava, ji bo tevahî jin û gelên cîhanê hêvî û daxwaza azadî û wekheviya civakî xurtir kir.

Hizrên Rêber Apo yên der barê azadî, wekhevî, demokrasî û zayendiya civakî de, hîmê bingehîn ê têkoşîna YPJ’ê ava kir. Rêber Apo bawer kir ku azadiya jinan wê rê li ber azadiya civakê veke, ev perspektîf ne tenê li Rojava, li tevahî cîhanê bû bingeha bilindkirina têkoşînê.

Di vê roja watedar a 4’ê Nîsanê de em ne tenê berxwedana YPJ’ê ya li hemberî DAIŞ’ê pîroz dikin, di heman demê de em feraseta azadî û wekheviyê ya ku Rêber Apo bi jinan daye qezenckirin pîroz dikin. Ramanên Rêber Apo, rehendeke enternasyonalîst bi YPJ’ê da qezenckirin û ji her çar aliyên cîhanê jinan berê xwe dan warê şoreşê. Di nava refên YPJ’ê de jinên ji çand û nasnameyên cuda hatin gel hev û di heman çeperê de mil bi mil li dijî DAIŞ’ê şer kirin, bingeha hevgirtineke kûrewî ava kirin. Ev hevgirtina enternasyonal ji bo azadiya tevahî jinan û gelan pir girîng e.

YPJ’ê ne tenê li dijî DAIŞ’ê, li dijî pergala desthiladar a cîhanî şer kir. Ev têkoşîna ku ji bo tevahî jin û gelan hat dayîn weke mîrasê hizir û ramanên Rêber Apo ye. Îro em di salvegera damezrandina YPJ’ê de ji hêza berxwedanê û ji felsefeya azadiyê ya Rêber Apo îlham digrin û bi vê hêzê em di riya azadî, wekhevî û edaletê de bi gavên hê xurtir bi pêş dikevin. Em bi vê bîr û baweriyê careke din vê roja watedar pîroz dikin.

Azadiya jinan, azadiya gelan e. Têkoşîna YPJ’ê ne tenê têkoşîna gelekî ye, têkoşîna tevahî mirovahiyê ye. Em ê bi hev re di nava hevgirtina enternasyonal de gavên xurtir bavêjin, bi vê baweriyê em careke din salvegera damezrandina YPJ’ê û rojbûna Rêber Apo li tevahî jinan û gelan pîroz dikin.”