Qamişlo- Weqfa Jina Azad li Qamişloya Bakur û Rojhilatê Sûriyeyê, di bin dirûşmeya 'Hunera Jinan Rûmeta Civakê ye' de pêşengeha huner û karên destan ên jinan lidar dixe. Pêşengeh ji bo her kesî vekirî ye da ku afrîneriya jinan di warên karên destan, modayê û hunerê de kifş bikin. Armanca wê ew e ku nirx û hunera jinan di civakê de nîşan bide.

Hewl dide karên jinan derxe pêş

Rêvebera Weqfa Jina Azad a Sûrîyeyê Siltana Xişo da zanîn ku bi boneya salvegera Weqfa Jina Azad pêşengek lidar xistine û wiha got: "Armanca me ya sereke, her dem pêşxistina hunera jinê ye. Em dixwazin vê hunerê derxin pêş. Ji ber ku jinan gelek ked dane û xwestine tiştên herî xweşik çêkin, me jî xwest kar û keda wan bidin pêş û pêşkêşî civakê bikin. Weqf di sala 2014 an de hatiye avakirin. Navenda Weqfê ya sereke li Qamişlo ye û ofîsên wê li gelek deverên Sûriyeyê belav kirine. Karê ku li Navenda Weqfê û Ofîsên wê tê kirin, di heman demê de em li kampan jî pêk tînin wekî kampa Hol, Roj û Waşokanî."

Ji bo avakirina malbat û civakek demokratîk

Siltana Xişo diyar kir ku weqf, li ser komîteyan tê avakirin û wiha got: "Komîteyên Weqfê yên erwerdê, tenduristî, proje, dîplomasî û mafnasî hene. Komîteya Perwerdê, di weqfê de ya herî sereke ye. Semînerên fikrî ji bo jinan û civakê pêşkêş dike da ku em bikaribin bi rêya jinan malbatek û civakek demokratîk ava bikin. Şoreşa Rojava di 2012`an de destpê kir û derfetên herî mezin da jinan, gelek saziyên taybet bi destên jinan hatine avakirin. Me peymangehên muzîkê vekirine ji bo ku em bi zarokan re alîkar bin û bi taybetî jî bi zarokîn koçber re. Me spora jinan jî ava kiriye. Saziyên karê dest û dirûtinê jî hene.."