Navenda Nûçeyan – Parêzera mafên zarokan a Fraksiyona SPD li Parlamentoya Elmanyayê Sara Larkamp  li ser malpera xwe ya Facebookê têkildarî rewşa girtiyên siyasî li Îranê peymek parve kir.

‘Divê tu zarok û dayik êş nekêşin’

Sara Larkamp di payama xwe de ragihand ku hezar û 200 rojin girtiya siyasî Suade Xedirzade û keça wê ya 2 salî ya bi navê Solîna di girtîgeha Urmiyeyê de tê girtin û wiha got: “Keça Suade li nava girtîgehê jidayîkbûye. Ew di şert û mercên xerab de dijîn û êş û azarê dikişînin. Her wiha ji lênêrîna bijîşkî û pêwîstiyên her dayikekê ji zaroka xwe re bêpar dimînin û mafên wan ên bingehîn nayên dabînkirin. Li gel Rêxistina Hewar Help ji bo azadkirina wan hewl didin. Divê tu zarok û dayik bi vî awayî êşê nekişîne.”

Herî dawî Sara Larkamp bang li çalakvan û azadîxwazan kir ku ji bo azadî û pêşerojeke baştir li Îranê werin bi hev re têbikoşin.

Sara Larkamp, parêzera mafên zarokan a ji Fraksiyona SPD li Parlamentoya Elmanyayê ye û ev zêdetirî 2 salin kefaleta Suade Xedirzade û keça wê Solîna ya 2 salî girtiye ser xwe. Her wiha li gel Rêxistina Hewar Help ji bo azadkirin wan hewl dide.

Hêjayî bi bîrxistinê ye di meha Îlona sala 2021’an de Suade Xedîrzade ya 24 salî û xelkê Pîranşar, ji aliyê hêzên ewlekariyê yên rejîma Îranê ve li Pîranşar hate binçavkirin û şandin girtîgeha Urmiyeyê. Bi tometa ‘endamtiya rêxistinek muxalîf’ 12 sal cezayê girtîgehê lê hate birîn. Dema Suade Xedirzade hatî girtin, du canî bû û neçar ma ku di nava rewşa tirsnak û metirsîdar a girtîgehê de zaroka xwe bîne dnê.

Beriya niha Suade Xedirzade ji ber zextên desthilata Îranê yên ji bo îtîrafkirinê, hewla dawî li jiyana xwe bîne dabû, rêgirî lê hatibû kirin.