Navenda Nûçeyan – Wezareta Tenduristiyê ya Xezeyê, bi boneya "8’ê Adarê Roja Jinan a Cîhanê" der barê tiştên ku jinên Filistînî yên li Xezeyê ku ev 5 meh in di bin êrîşên Îsraîlê de dijîn û mehkûmê birçîbûnê hatine, daxuyaniyeke nivîskî da.

Di daxuyaniyê de hate diyarkirin ji sedî 49’ê nifûsa Xezeyê jin pêktînin û wiha hat gotin: "Li Zîvala Xezayê 60 hezar jinên ducanî rastî kêmxwarinî, dehîsrasyon û kêmbûna lênerîna tenduristiyê ya guncav tên. Ji wan nêzî 5 hezaran her meh ji ber bombebaran û koçberbûnê di nava şert û mercên zehmet, bêewle û bêtendurist de zarok tînin.”

9 hezar jin jiyana xwe ji dest dan

Di daxuyaniyê de hate destnîşankirin, ji ber êrîşên Îsraîl ên 5 meh in didomînin, tevahiya jinan ji ber xwarina kêm û bêtenduristî pirsgirêkên cidî dijîn. Di daxuyaniyê de hate diyar kirin di êrîşan de 9 hezar jin jiyana xwe ji dest dane û wiha hate gotin: "Bi taybetî Zîvala Xezayê hemû jinên Filistînî, ji ber êrişên Îsraîlê bi kareseta mirovî ya herî mezin a wek qetilkirin, koçberkirin, girtin, kurtaj, nexweşiyên şewb û mirina ji birçîbûnê re rû bi rû dimînin.”

Jin hewl didin xwe li jiyanê bigrin

Di daxuyaniyê de bang li Neteweyên Yekbûyî û rêxistinên jinan ên li seranserê cîhanê hat kirin ku ji bo demil dest dawî li êrîş û qirkirina Îsraîlê ya li dijî jinên Filistînî û malbatên wan bê anîn, bikevin nava liv û tevgerê. Her wiha di daxuyaniyê de bang li saziyên navneteweyî hat kirin bi taybet li herêma Xezayê piştgirî bidin jiyan, tenduristî, derûnî û pêdiviyên civakî yên jinên Filistînî.