NAGHAM KARAJEH

Xeza - Navenda "Masarat" û Lêkolînên Stratejîk bi hevkariya Weqfa Aştiyê ya Martti Ahtisaarî di çarçoveya bernameya "Jin di belavkirina aştiyê" de bi navê "Eksên Belgeya Stratejîk a Xebatên Hevpar ên Femînîst " komxebatek bi rêya sepana Zoomê li dar xist.

Endama Meclisa Zagonsaz a Filistînê Xalîda Jerar got ku beşdarbûna jinan di siyasetê de di du waran de tê, ya yekem kolonyalîzm û dagirkerî ye û ya duyem jî rewşa navxweyî ye û wiha pê de çû: "Ez girtina xwe ya dawî ya ji ber beşdariya min a siyasî tu carî ji bîr nakim. Tevlîbûna jinan a siyasî hîna kêm e. Jin rastî hemû cureyên tundiyê tên, nemaze tundiya siyasî ji ber bîr û baweriyên xwe, dema ku nêrîna xwe tînin ziman ji aliyê dezgehên ewlekariyê ve tên gazîkirin."

Rêvebera Komeleya Jinên Kedkar a Filistînê ya ji bo Pêşketinê Amal Xerîşe da zanîn ku diyarkerên giştî û objektîf hene ku tevlîbûna jinê ya siyasî qels dike, di nav de lawazbûna tevgera neteweyî.

Dr. Meryem Ebû Deqa eşkere kir ku jinên Filistînî beşeke bingehîn a têkoşîna siyasî ya giştî ne û wiha anî ziman: "Di çarçoveya Yekîtiya Giştî ya Jinan de krîzek heye, di feraseta pêşkeftî ya tevlîbûna jinan de paşveçûn û ne zelalî heye. Hebûna jinan di nava partiyan de roleke mezin di krîstalkirina kesayetî û yekkirina gotara jinan de dilîze. Ji bo rûbirûbûn û têkoşîna li dijî hêman û sedemên ku jinan vedigerînin divê însiyatîfên femînîst bê destpêkirin."

Rêvebira Giştî ya Weqfa Jinan a Filistînê Wefa Ebdulrehman destnîşan kir ku divê çavdêrî li ser biryarên sîstema siyasî hebe û wiha axivî: "Her kes biryarên Encûmena Navendî ya girêdayî jinan pesnê xwe dide, lê biryarên ku hatine paşguhkirin jî hene, wek biryara serokatiyê ya sala 2006'an derbarê beşdarbûna jinan di danûstandinan û lihevhatinê de, biryara hejmar 1325. Ez pêşniyar dikim ku biryar dubare were rweşandin."