ZEYNEB ÎSA

Qamişlo – Li dijî siyaset û sîstema baviksalarî ya dewleta Îranê ya li ser jinan û piştî qetilkirina Jîna Emînî, jinên Îranê serî hildan û êdî siyaseta tunekirin û îmhakirinê qebûl nakin. Di bin felsefeya Jin Jiyan Azadî de tevdigerin û çalakiyên xwe li dar dixin. Dewleta Îranê gelek hewl da ku bi dîlgirtina jinan û binçavkirina wan dawî li vê şoreşê bîne. Lê kiryarên li dijî jinan, binçavkirin, girtin û îşkenceya ku li jinan hat kirin, nekarî li hemberî şoreşa Jin Jiyan Azadî bibin asteng û şaxên xwe li seranserî cîhanê belav kirin.

Jinên çalakvan û rojnamevanên ku rastiya dewleta Îranê eşkere dikirin hatin girtin û îşkencekirin û biryarên darvekirinê li wan hatin birîn. Rojnamevan Şerîfe Muhemedî di sala 2023'yan de bi hincetên cuda hat dîlgirtin û biryara darvekrinê lê hat birîn. Berdevka Komîteya Perwerdeyê ya Kongra Star a Qamişlo ya Bakur û Rojhilatê Sûriyeyê Rohilat Muslim, derbarê biryara darvekirinê ya ku rejîma Îranê li çalakvan û kedkara mafên jinan Şerîfe Muhemedî birî de, ji ajansa me re axivî.

‘Di bin navê olê de jinan dîl digre û cezayê darvekirinê dide’

Rohilat Muslim li ser siyaseta rejîma Îranê diyar kir ku di bin navê olê de siyasetên qirêj dimeşîne û jinên çalakvan û kedkar dîl digre û got: “Rejîma Îranê sîstemeke pir girtî ye, siyaseta xwe zû bi zû nîşan nade, ev yek jî siyaseta hişk, baviksalarî û olperestî ye. Rejîma Îranê bi riya olê siyasetên xwe yên qirêj dide meşandin, ev siyaset di Îranê de pir hatiye meşandin. Beriya demeke Serokê Îranê hat kuştin, piştî kuştina wî tu guhertin li Îranê çênebû. Her dem ev sîstema olî û baviksalarî di hundirê Îranê de tê meşandin.”

‘Şoreşa Jin Jiyan Azadî bi ser bikeve’

Rohilat Muslim bal kişand ser dîlgirtina çalakvan û kedkara jin Şerîfe Muhemedî ku cezayê darvekirinê lê hatiye birîn, biryara rejîma Îranê ya darvekirinê şermezar kir û wiha berdewam kir: “Em hemû jî dizanin ku di vê dawiyê de biryara darvekirinê li çalakvan û kedkara mafên jinan Şerîfe Muhemedî hatiye birîn. Çima ev biryar li wan jinan tên birîn? Ji ber ku tirsa Îranê ji wan heye, dizane şoreşeke mezin li dijî siyaseta wî ya baviksalarî û olperestî tê lidarxistin û wê tune bibe, têkoşîna jinan bi ser bikeve. Ji bo wê jî jinên me yên siyasetmedar û çalakvan û kedkarên mafên jinan dîl digre û cezayên darvekirinê li wan dibire. Ji bo wê jî em wek rêxistina jinan, van biryaran bi tundî şermezar dikin û wê şoreşa Jin Jiyan Azadî bi ser bikeve.”

‘Têkoşîna me her dem dê berdewam bike’

Rohilat Muslim tekez kir ku wê weke rêxistina jinan têkoşîna xwe bidomînin heta ku azadiya hemû jinan bi dest bixin, şoreşa jinan bi ser bikeve û wiha bi dawî kir: “Em jî weke rêxistina jinan piştgiriya hemû jinan dikin û bi taybetî şoreşa Jin jiyan Azadî ya ku piştî qetilkirina Jîna Emînî hat destpêkirin. Em ji saziyên mafên mirovan re dibêjin ku çavên xwe vekin û mafên jinan biparêzin. Têkoşîna me wê ji bo azadkirina Şerîfe Muhemedî berdewam bike.”