Navenda Nûçeyan – Di 21’ê Çileyê de Parlamentoya Iraqê projeyasaya guhertina Qanûna Rewşa Kesî ya Iraqê ya bi hejmara 188 ya 1959’an, tevî bertek û nerazîbûnan li gel du qanûnên din erê kir. Vê yekê rê li ber nerazîbûn û bertekên tund ên navxweyî û derveyî vekir.

Di heman çarçoveyê de îro bi pêşengtiya Hevpeymaniya 188, bi beşdarbûna dehan jin û çalakvanan, li Bexda ya paytexta Iraqê, li dijî erêkirina guhertina Yasaya Rewşa Kesî ji aliyê Parlamentoya Iraqê ve, xwepêşandan hate lidarxistin. 

Xwepêşanderan bi pankartên ‘Qanûnê qebûl nakin’ û ‘Guhertina Qanûna Rewşa Kesî li ser bingeha mezhebperestiya nijadî bû’ nivîsandî hildan û diyarkirin ku guhertina vê qanûnê red dikin.