Silêmanî- Dewleta Tirk êriş û dagirkeriya xwe ya li ser xaka başûrê Kurdistanê dijwartir kiriye. Van êrişên ku bi plan û hevkariyê, hikumeta Herêma Federal û dewleta Iraqê pêk tên, ger rastî helwesteke xurt a gel neyên dê xeterên mezin bi xwe re bînin. Piştî ku peyman di navbera dewleta Tirk û Iraqê de hat îmzekirin bi qetilkirina rojnamegeran, plan û hevkariya wan ket meriyetê.

Di 3’yê Tebaxê de li nêzî navçeya Seyîdsadiqa Silêmaniyê wesayîda rojnamegerên çapemeniya azad ji aliyê balafira bê mirov û bi çek a dewleta Tirk ve hat bombebarankirin. Di encama êrişê de du rojnamegerên jin Gulistan Tara û Hêro Behadîn jiyana xwe ji dest dan. Her wiha Rêbîn Bekir bi giranî, 5 rojnamegerên din jî birîndar bibûn.

‘Tirkiye hewl dide ji sedî 75’ê xaka Dihokê dagir bike’

Çalakvan Mîhrîban Elî der barê qetilkirina rojnamegeran û dagirkeriya dewleta Tirk a bi dirêjiya 70 kîlometre ketina nava xaka Başûrê Kurdistanê, bêdengiya partî û aliyên pêwendîdar û hikumeta Iraqê de wiha got: “Ez êrişên dewleta Tirk ên li ser xaka başûrê Kurdistan û hedefgirtina kesên azadîxwaz û rojnamegeran bi tundî şermezar dikim. Dewleta Tirk rojane êrişî ser gund û xaka Başûrê Kurdistan dike. Navçeyên başûr bombebaran dike, sivîlan hedef digre. Ger em girêdayî Iraqê bin, çima Iraq dengê xwe nake û li dijî van êrişan helwesta xwe nîşan nade? Ji ber ku hikumeta Herêma Federal xwe ker û lal kiriye, Tirkiye hewl dide ji sedî 75’ê xaka Dihokê dagir bike, bigihîje heta Silêmaniyê û êriş bike.”

‘Li her cihê MÎT heye’

Mîhrîban Elî di berdewamiya axaftina xwe de wiha got: “Niha rewş gelek xirab e. Îstîxbarata Tirk (MÎT) sîxurtiyê dike û li Silêmaniyê û navçeyên din dixebite. Ji ber vê nabe ku gelê Kurd ligel hevûna van sîxur û êrişan li ser xaka xwe bêdeng bimîne û qebûl bike. Dewleta Tirk çav berdaye hemû xaka Kurdistanê û êrişê têkoşeran dike. Ji bo wê girîng e helwesta me hebe û em vê dagirkeriyê qebûl nekin. Divê xebat û têkoşîna azadîxwazan berdewam bike. Divê helwesteke wisa hebe ku Hikumeta Herêma Federal û ya Iraqê neçar bimînin paşve gav bavêjin. Divê em wisa bikin ku dewleta Tirk ji cihên dagirkirine derbikeve. Divê hemwelatiyên herêmê zextê li desthilatdariyê û hikumetê bikin û wan neçar bikin ku dengê xwe derbixin.”