Şehba- Tevgera Çand û Huner û Hîlala Zêrîn ên Efrîn-Şehbayê, bi boneya salvegera 32’emîn a Gurbet Aydin (Hozan Mizgîn) çalakiyek bîranînê li dar xist.

Çalakî li hola Çand û Huner a navçeya Ehdas Şehbayê hate lidarxistin. Hol, bi wêneyên Rêberê Gelê Kurd Abdullah Ocalan û hûnermend û pêşenga têkoşîna jinên Kurd Hozan Mizgîn hat xemilandin.

‘Xeta jina azad bi huner û têkoşîna xwe parast’

Piştî deqeyek rêzgirtinê, Hevseroka Tevgera Çand û Huner Efrîn-Şehba Newroz Silêman axivî û wiha got: "Em salvegera şahadeta Hozan Mizgîn û tevahî pakrewanên Tev-Çandê bi bîr tînin û soza xwe li ser şopa wan carek din nû dikin. Hozan Mizgîn bi huner û dengê xwe bû mînaka jina azad û leheng. Li hemberî hêzên desthiladar û rûxmê hemû şert û mercên jiyanê yên dijwar çanda gelê xwe bi rêya dengbêjiya xwe zindî dikir û di nava civakê de belav dikir.

Îro bi hezaran Mizgîn li ser dikê azadiyê çanda xwe zindî dikin û ji qirkirinê diparêzin. Em ê şopdarê Hozan Mizgîn bin û tu carî dev ji xebatên xwe yên çandî û hunerî bernadin û ji nifşên nû re her zindî bikin. Hozan Mizgîn bû bingeha avakirina koma Berxwedan ê stranan û bi dengê xwe yê zelal û tilliyên xwe yên zêrîn xwe gihand hemû dilên mirovan û xeta jina azad bi huner û têkoşîna xwe parast."

Piştre der barê jiyana Hozan Mizgîn û cangoriyên Tev-Çand de sinevîzyonek hate pêşkêşkirin. Di dawiya çalakiyê de koma stranan ên Tevgera Çand û Huner û Hîlala Zêrîn derketin ser dikê û stranan vegotin.