Navenda Nûçeyan – Azadiya jinan ne îmtiyazek e ku ji hêla hikûmetê ve bi awayekî kêfî bê dayîn û stendin û cil û berg ne amûrek e ku dilsoziya îdeolojîk bipîve an jî serîdanînê ferz bike.

Jinên Kurd red û rexne dikin

Rêzgirtina mafê jinan a hilbijartina cil, nasname û biryarên kesane, ji bo her projeyek ku îdîa dike dewletek azad û piralî ava dike ku rêzê li rûmeta welatiyên xwe digre, pîvanek bingehîn e. Çavkaniyên di nav Hêzên Ewlekariya Navxweyî de, ji ajansa me re ragihandine ku Hikûmeta Demkî ya Sûriyeyê ber bi ferzkirina kodek cil û bergên taybet a li ser endamên jin ên Hêzên Ewlekariya Navxweyî (Asayîş) ve diçe. Ev gav di nav jinên Kurd de bûye sedema redkirin û rexneyên berfireh. Tirsek serdest heye ku ev tedbîr ber bi ferzkirina vîzyonek civakî û îdeolojîk a hişk li ser jinan û destwerdana azadiyên wan ên kesane û nasnameyên çandî, beşek ji meyleke berfirehtir in.

Amûrek ji bo ferzkirina vîzyonek îdeolojîk a taybet a li ser jinan

Meseleya ferzkirina kodek cil û bergên taybet, nikare tenê wekî tedbîrek rêxistinî an meseleyek xuyangê bê dîtin. Veguherandina cil û bergên wekî amûrek ji bo ferzkirina vîzyonek îdeolojîk a taybet a li ser jinan, derî li ber sînorkirinên din vedike ku dikarin hêdî hêdî li ser aliyên cûda yên jiyana wan û azadiyên wan ên kesane û civakî belav bibin. Ev meyl pirsên cidî li ser xwezaya modela civakî ya ku hikûmeta demkî hewl dide li Sûriyeyê ava bike, derdixe holê. Bi taybetî jî, ji ber fikarên li ser vegera îdeolojiyên tundrew ên ku jinan wekî tiştên wesayet û kontrolê dibînin, azadiya wan kêm dikin da ku li gorî pîvanên ku ji hêla rayedaran ve têne ferzkirin tevbigerin û mafên wan ên hilbijartin û serwebûnê paşguh bikin.

Fikara ji ber mînaka Talîbanê 

Ev gav di nav derdorên jinên Kurd de bûye sedema redkirin û rexneyan. Jin mafê xwe yê parastina nasnameya xwe ya çandî û hilbijartina xuyang û cilên xwe ya bi awayek azad diparêzin. Gelek ezmûn, nemaze li Efganistana ku ji hêla Talîbanê ve tê rêvebirin, nîşan didin ka çawa sînorkirinên li ser cilên jinan dikarin bibin beşek ji pergalek berfirehtir ku maf û azadiyên wan sînordar dike û rê li ber beşdarbûna wan a çalak di jiyana giştî de digre.