Silêmanî - Li Emnesor ya bajarê Silêmanî Eniya Piştgiriya Rojavayê Kurdistanê ku ji komek nunerên partî û rêxistinên Başûrê Kurdistanê pêk tê, li kolana Emnesureke ya li Silêmaniyê, ji bo 10’emîn salvegera Şoreşa Rojavayê Kurdistanê, daxuyaniyek çapemeniyê da û daxwaz kir ku rê li ber dagirkeriya tirk a li ser Rojavayê Kurdistanê bê girtin.

“Divê rêxistinên navnetewî xwedî helwest bin”

Endamê Eniya piştgiriya Rojavayê Kurdistanê Doktor Nîkola Eşref wiha axivî: “Armanca me ew e ku em bala civaka navdewletî bikşînin li ser rewşa Rojavayê Kurdistanê. Bi taybet niha di civîna di navbera Rusya, Tirkiye û Îranê ya li Tahranê, êrîşên dagirkeriyê yên li ser Rojavayê Kurdistanê tê nîqaşkirin. Divê rêxistinên civaka medenî û navdewletî xwedî helwest bin û karên cidî ji bo rêgiriya êrîşên dagirkeriyê bikin.”

“Divê rê li ber dagirkeriyê bê girtin”

Endamê Eniya piştgiriya Rojavayê Kurdistanê Bextiyar Mistefa daxuyanî da û di daxuyaniyê de wiha got: “Em piştgiriyê didin banga 33 partiyên Rojavayê Kurdistanê ya ji balafiran re girtina asîmanê Rojavayê Kurdistanê. Dewleta tirk bi alîkariya komên terorîst, bikaranîna çekên qedexekirî, êrişî ser bajar û gundan dike û dagir dike. Ev jî li gorî yasaya navnetewî, binpêkirin e. Pêwîst e Emerîka, Rusya, Neteweyên Yekbûyî, Hevpeymana Navnetewî ya dijî DAIŞ’ê, NATO, Yekîtiya Ewrupa, Dadgeha Mafê Mirovan ya Ewropayê, hêz û aliyên siyasî yên her çar parçeyên Kurdistanê, Hikumeta Herêmê, Rêxistinên Navnetewî, kesayetên demokrasîxwaz yên cîhanê, vê rastiyê baş bizanin û bi hemû awayî rê li ber êrişên dagirkeriya Rojavayê Kurdistanê bigrin.”