Navenda Nûçeyan – Li Herêma Kurdistanê tundiya li dijî jinan didome, li gorî daneyên ku ji aliyê ajansa ROJNEWS’ê ve hatine berhevkirin, di meha Gulana îsal de, li Herêma Kurdistanê 4 jin hatine qetilkirin.

Li gorî vê:

Di 3’yê Gulanê de li taxa Teyrawe ya Hewlêrê ciwanek 18 salî bi 11 guleyan xwişka xwe ya 17 salî qetil kir û piştre ji aliyê polîsan ve hat binçavkirin.

Di 20’ê Gulanê de li Dihokê, bi guleyan jinek ciwan a 29 salî û birayê xwe birîndar bûn û kesê êrîşkar hat binçavkirin.

Di 23’yê Gulanê de li Hewlêrê cenazeyê jinek bi navê Xerman Şemsedîn hat dîtin û heta niha der barê bûyerê de tu daxuyaniyek fermî nehatiye dayîn.

Di 31’ê Gulanê de li taxa Qendîl a Çarqurne ya bajarê Silêmaniyê, di encama gulebarankirina malek de, jinek temenê wê 40 salî jiyana xwe ji dest da û 3 kes jî birîndar bûn. Yek ji birîndaran jî jinek ciwan bû.

Her wiha di 31’ê Gulanê de li ber deriyê projeya niştecihbûnê ya Dream Sity a li Hewlêrê, jinek ji aliyê çekdarek ve bi 10 guleyan hat qetilkirin.