Navenda Nuçeyan - Sibê bi pêşengiya Komîsyona Jinan ya Kongreya Netewî a Kurdistan (KNK) û Yekîtiya Jinan a Kurdistanê bi dirûşma “Qirkirina jinan bi dawî bikin” dê şêwira Jinên Kurd li bajarê Silêmaniyê bi amadebûna jinên ji her çar aliyên Kurdistanê were li darxistin. Di şêwira Jinên Kurd a ku wê li Hola Tewar ya Silêmaniyê pêkwere de dê nîqaş dibin pênc sernavan de bên pêşxistin û dê du panel bên dayîn. Herî dawî jî dê encamnameya şêwirê bi raya giştî re bê parkirin.

Şêwir wê destpêkê bi axaftina Sekretera Yekîtiya Jinên Kurdistan Kafiye Silêman û Hevseroka Kongreya Netewî ya Kurdistanê Zeyneb Murad destpê bike.

Piştre dê panela yekem destpê bike. Di panela yekem de wê mijarên “Tundûtujî û girtina jinan ya ji ber desthilata siyasî, di nasnameya jinan de rola yasa û çandê û rewşa jinan a dibin zextên siyasî de” werin pêşkêşkirin.

Di panela duyem de jî wê “Rewşa jinan a dibin desthilata dagirker de, rewşa jinên Êzidî ya di rastiya niha de” werin pêşkêş kirin.

Ji her çar aliyên Kurdistanê wê aktivîst, parlamenterên jin tevlî şêwirê bibin û mijarên xwe pêşkêş bikin.