Navenda Nûçeyan – 21 parlamenterên ji Parlamentoya Ewropayê li dijî êrişên dewleta Tirk ên li ser gelê Bakur û Rojhilatê Sûriyeyê nameyek ji Nûnera Bilind a Polîtîkaya Ewlekariyê û Karên Derve ya Yekîtiya Ewropayê û Alîkara Seroka Komîsyona Ewropayê Kaja Kallas re nivîsîn û bang li Komîsyona Ewropayê kirin ku bi erka xwe rabe.

Nameya parlamenterên ji Çep a Yekbûyî ya Ewropayê, Kesk/Koma Azadiyê ya Ewropayê, Koma Çep a Parlamenta Ewropayê, Koma Reformîst û Muxafazakaran a Ewropayê, Tifaqa Demokrat û Sosyalîstan û parlamenterên serbixwe bi vî rengî ye:

"Birêz Kallas, Em fikarên xwe yên li ser Sûriyeyê bi taybetî jî li ser paşeroja gelê Rêveberiya Xweser a Bakur û Rojhilatê Sûriyeyê bi we re parve dikin.

Gefa dagirkeriyê ya dewleta Tirk

Rêveberiya Xweser mîna we daxwaza Sûriyeyeke aştiyane, pirrengî, aram dixwaze ku ji aliyê gelê Sûriyeyê ve were birêvebirin. Di valahiya siyasî ya ji ber Şerê Navxweyî yê Sûriyeyê de ji kêliya ku kontrola herêmê xiste destê xwe û vir ve, her wiha piştî ku herêm ji DAÎŞ'ê hate rizgarkirin, ev pîvan bû bingeha sîstema Rêveberiya Xweser. Di nava şerê navxweyî de jiyaneke bi hev re ya aştiyane û giraveke ji mafên jinan ava kirin û ev yek ji bo tevahiya Sûriyeyê weke modelekê nîşan da ku xwe weke parçeyek ji Sûriyeyê dibîne.

Lê belê niha ku dema biryardanê li ser Sûriyeyê ye, ev modela aştiyane, pirçandî û femînîzmê di bin êrîşên belasebep ên milîsên dewleta Tirk de ye û di bin gefa dagirkeriyê ya dewleta Tirk de ye.

‘Divê zextê li Tirkiyeyê bike ku êrîşkariya xwe bisekinîne’

Di vê demê de ku li ser paşeroja Sûriyeyê bi gelek aliyên cuda re hevdîtinên cuda û danûstandin têne kirin, qala tevlîbûna Rêveberiya Xweser û Hêzên Sûriyeya Demokratîk a li danûstandinan û entegrasyona wan a li Komara Sûriyeyê ya nû tê kirin. Rêveberiyeke nenavendî pêşniyar dikin û di heman demê de destnîşan dikin ku li hemberî metirsiyên derve dikarin xwe biparêzin.

Ev encamên hevdîtinên hesas û girîng ji bo Sûriyeyê û paşeroja wê gelekî girîng e. Em vê nivîsê dinivîsînin, ji bo Komîsyona Ewropayê bandora xwe bi kar bîne, piştgiriyê bide vê civaka demokratîk û xweşbîn, zextê li Tirkiyeyê bike ku êrîşkariya xwe bisekinîne.

Em bala we bi taybetî dikişînin ser rewşa li Bendava Tişrînê ku li ser çemê Firatê ye ku di bin êrîşa dewleta Tirk de ye. Ev êrîş bû sedem ku heta niha nêzî milyonek mirov ji elektrîk û çavkaniyên avê bêpar bimînin û rîsk heye ku eger bendav hilweşe wê felaketeke mezin rû bide. Herikîna avê dikare Bendava Tebqayê jî derbas bike û hilweşîn dikare bigihêje heta Iraqê, bibe sedem ku bi sed hezaran penaberên nû rû bidin. Gelê xwecihî ku ji bo balê bikişîne ser vê gefê, li bendavê xwepêşandanên şermezarkirinê lidar dixe, lê belê gelek caran ji aliyê hêzên hewayî yên Tirkiyeyê ve hate bombekirin û herî kêm 17 kes hatin kuştin, gelek kes jî birîndar bûn.

‘Pêşketinên mînak ên li Bakur û Rojhilatê Sûriyeyê ji bo ewlehiya me hemûyan e’

Êrîşên Tirkiyeyê yên li ser herêmên sivîl dewam dikin. Ji destpêka meha Kanûnê û vir ve di êrîşên Tirkiyeyê de nêzî 100 sivîlan jiyana xwe ji dest dan. Ambûlans hatin bombekirin, sûîqest li rojnamevanan hate kirin û depoyên genim hatin xerakirin.

Her wiha em fikarên xwe yên li ser bi hezaran mehkûmên DAIŞ'ê û malbatên wan ên radîkalbûyî tînin ziman ku ji bo xilasiya ji dîlgirtinê hêviya xwe bi Tirkiyeyê ve girêdane.

Em hêvîdar in ku Yekîtiya Ewropa li hemberî vê destwerdana hilweşîner û derve ya metirsîdar, piştgiriyê bide pêşketinên mînak ên bi pêşengiya Sûriyeyiyên li Bakur û Rojhilatê Sûriyeyê, başiya wan ji bo paşeroja Sûriye û tevahiya Rojhilata Navîn e, ji bo ewlehiya me hemûyan e.

Bi hurmet,"

Parlamenterên ku mohra xwe danîne binê nameyê bi vî rengî ne:

CLAUSEN Per

ORLANDO Leoluca

SCHIEDER Andreas

BARRENA Pernando (GUE/NGL)

CHAIBI Leila (GUE/NGL)

DEMİREL Özlem (GUE/NGL)

EVERDING Sebastian (GUE/NGL)

FRAGKOS Emmanouil

GEDIN Hanna (GUE/NGL)

GROSSMANN Elisabeth (S&D)

HEIDE Hannes (S&D)

LOISEAU Nathalie (Renew)

MARZA IBANEZ Vincent

MAVRIDES Costas (S&D)

PAPANDREOU Nikos (S&D)

REUTEN Thijs (S&D)

SALIS Ilaria (GUE/NGL)

SIDL Guenther (S&D)

SJÖSTEDT Jonas (GUE/NGL)

STRADA Cecilia Maria (S&D)

ZACHARIA Maria