Navenda Nûçeyan- Belgefîlma Misrî ya sala 2024’an, The Brink of Dreams ‘Berava Xeyalan’ (Brink of Dreams) ku derhêneriya wê ji aliyê Nada Riyadh û Ayman El Amir ve hatiye kirin (bi navê xweser Rafaat Einy Ll Sama), çîroka koma şanoyê ya Panorama El Barsha ku şirketeke şanoyê ya bi tevahî ji jinan pêk tê û li gundê El Barsha yê herêma Minya dixebite, vedibêje. Fîlmê bi qasî 102 deqeyan didome, têkoşîna jinên ciwan ên Qiptî ku xeyal dikin lîstikvanî, reqs û stranbêjiyê bikin û hewldanên wan ên ji bo xwe îfadekirina bi rêya huner û hêviyên civakî, nîşan dide.

Lêgerîna azadiyê ku bi hunerê re tê

Belgefîlm ne derbarê lîstikvanên profesyonel, derbarê jinên ciwan ên ku jiyan û ezmûnên xwe li ber kamerayê parve dikin de ye. Bi rêya performansên kolanan, kom li ser mijarên wek zewaca zû, tundiya navmalî û azadiya jinan hişyariyê zêde dike, normên civakî yên kevneşopî dipirse. Çêkirina fîlmê ku çar salan dom kir, rêwîtiya jinên ciwan ji zarokatiyê heta mezinbûnê, armancên wan ên hunerî û zextên civakî yên ku ew pê re rûbirû dimînin belge dike. Fîlm bi taybet li ser nakokiya di navbera xeyalên kesî yên jinan û hêviyên jiyanê yên ku ji hêla malbat û civakê ve têne danîn disekine. Beşa yekem a fîlm, pêvajoya hilberîna hunerî ya koma şanoyê ronî dike. Jinên ciwan ji bo dîtina cîhên provayê yên çêtir têdikoşin, ji maseyan dîmenên împrovîze diafirînin û ji bo ku dengê xwe li kolanan bidin bihîstin, serî li rêbazên danasînê yên afirîner didin.

Çîrokek piştevanî û mezinbûnê

Di vê pêvajoyê de, huner ji tenê şêweyekî derbirînê derbas dibe, vediguhere cihek ku jin sînorên civakî dipirsin û çîrokên xwe ava dikin. Rageşiya di navbera armancên hunerî û normên civakî yên hişk de enerjî û dînamîkên pevçûnê yên fîlmê diyar dike. Tevî dîmenên berfireh ên ku ji hêla pêvajoya kişandina fîlmê ya çar salan ve têne pêşkêşkirin, fîlm balê dikişîne ser vegotinê. Ji têgehên abstrakt, pêşgotinên dirêj û hûrguliyên nehewce dûr dikeve, hilberîn veguherîna kesane û ezmûnên hevpar ên jinên ciwan bi vegotinek hêsan vedibêje.  The Brink of Dreams ji bilî xeyalên kesî, derfetên jinan ên ku bi piştgiriya hev û bi hev re tevbigerin xwe bihêz dikin eşkere dike. Ruhê civakê û hevgirtin dibin mijarên sereke yên fîlmê.

Fîlm di Mîhrîcana Fîlman a Cannesê ya 2024’an de bi çêkerek din re xelata ‘Çavê Zêrîn’ (L’Œil d’or) ji bo sînemaya belgefîlm parve kir.