SANÎA MORADÎ

Sine – Em ber bi cîhana ku li cihê çîrokên mezinan, bebikên bi destan hatine çêkirin serpêhatiyan vedibêjin ve dikevin rêwîtiyê. Tiştên ku tên vegotin, serpêhatiya min, we û hemû kesan e… Her çendî çîrokên bi êş, şirîn, kêfxweş hebin jî bi giştî serpêhatî bi bextewarî bi dawî dibin.

Negîn Wekîlî bebikên pêlîstok bi serpêhatiyên wan re tîne ba hev û ji me re pêşkêş dike.

Li ser bebikan cilên ji her rengî yên behsa jiyanê dikin hene. Negîn Wekîlî di pêşangeha xwe de gelan û welatên cuda bi pêlîstokên bebik tîne ba hev. Ev bebik, hem êşan hem jî hêviyê vedibêjin. Van bebikên ku bi malzemeyên cuda bi baldarî û hunerî hatine çêkirin, ne tenê obje ne, didin hîskirin ku her yek ji wan xwedî serpêhatiyeke rastîn e û hûn jî perçeyek ji wê jiyanê ne.

Bebikên ji herêmên cuda

Seroka Dibistana Rang Roya û Kovara Ciwan û Zarokan a Rang Roya Negîn Wekîlî, bi salan e ji herêmên cuda bebikan berhev dike. Di nava koleksiyona wê de gelek bebikên ku xwedî sembolên çandî ne hene. Negîn Wekîlî li ser koleksiyona ku di pêşaneha wê de heye wiha dibêje: “Dayika min, ji zarokatiyê ve ji min re ji qumaş, texte, çerm û malzemeyên din bebikan çêdikir. Vê yekê eleqeya min a ji bo wan pêlîstokan zêdeir dikir. Bebikên ku hûn niha dibînin, ên dema zarokatiya min in û hemûyan malbata min çêkirine. Min hemûyan berhev kir. Vê eleqeya min a ji bo wan bû sedem ku ez ji herêmên din jî bebikan berhev bikim.”

Her yek xwedî serpêhatiyek e

Bebikek di pêşangehê de aydê zarokek e, yek jî ya zarokek keç a di temenê zarokatiyê de hatiye zewicandin e. Negîn Wekîlî diyar dike ku pêşangeh mîrasek e, her pêlîstokek çîrokên cuda vedibêje. Negîn Wekîlê bebikan îşaret dike û wiha dibêje:

“Bebikên Bagcheh ên Xorasanê ne. Ji ber ku bûk piştî dawetê nikare bi hêsanî bi malbata hevjînê xwe re xwarinê bixwe, dayika bûkê hinek xwarinê dikir nava bebika ku dişibe torbeyan. Di nava bebikê de xwarina ji bo bûkê heye. Beşek din ên bebikan jî ên ji welatên Efrîqayê ne. Behsa dema zayînê dikin û balê dikşînin ser. Bi navê bebika zayînê tê nasîn û li hembêz û sermilên van bebikan bebikek heye!"

Bebikên ku ji bo bereketê tên çêkirin

Negîn Wekîlî dide zanîn ku hinek ji wan bebikan di rîtuelan de hatine bikaranîn û wiha didomîne: "Ev bebik di rastiyê de bi kevçiyên darîn tên çêkirin. Ji bo baran bibare tên bikaranîn. Ji wan re dibêjin bebika birincê jî. Dema ku zeviya birincê tê rakirin, giyayên birincê tên çêkirin û datînin koşeyek malê. Ev yek ji bo bereketê û spasdariya ji xwezayê re tê kirin. Bi wê yekê bawer dikin ku dê sala li pêş berhemdarî zêdetir bibe. Negîn Wekîlî dibêje ku di navbera bebikan de Şahmaran a ku yek ji destanên dîrokî yên Kurdistanê ye jî heye û wiha didomîne: "Bedena Şahmaran mar e. Ev fîgor kukên wê li Kurdistanê ne. Min xwest Şahmaran di pêşangeha min de hebe ji ber ku jineke xwedî kevneşopiyên herî berê ye."

Negîn Wekîlî bal kişand ku bebikên li pêşangehê çand û dewlemendiyê nîşan didin û bawer dike ku ew bi serpêhatiya her yekê ji wan hêza jinan nîşan dide. Di vê cîhana ku gelek jinan derfet nedîtine zarokatiya xwe bijîn, tişta em di vê pêşangehê de dibînin, ew e ku; her tişta ji bo jinan hatiye redkirin, bi awayê afrîner hatiye sembolîzekirin.