Qamişlo –  Li Zanîngeha Rojava ya bajarê Qamişlo yê Rojavayê Kurdistanê, di pêngaveke ku pabendbûna xwe ya ji bo avakirina nifşeke hişmend, afirîner û vejandina jiyana zanîngehê wekî cihekî ji bo zanist, çand û hunerê nîşan dide, çaremîn Festîvala Biharê duh dest pê kir. Festîvalê du rojan berdewam kir û di roja xwe ya duyemîn de bi dawî bû.

‘Festîvalê jêhatiyên xwendekaran nîşan da’
 

Xwendekarên zanîngehê, karmendên rêveberiyê û kesayetên çandî û civakî beşdarî festîvalê bûn. Armanca festîvalê ew e ku derfetek bide xwendekaran da ku jêhatiyên xwe nîşan bidin her wiha van jêhatiyên xwe di warên curbecur de baştir bikin û atmosfereke înteraktîf biafirînin ku bibe alîkar têkiliyên civakî di navbera xwendekaran de xurt bike, zextên akademîk sivik bike û nirxên xebata daîmî û aydiyeta saziya perwerdeyê xurt bike.

‘Festîvalê hawirdorek zanîngehê ya zindîtir û înteraktîftir afirand’

Beşdaran tekezî bi girîngiya vê çalakiyê ku di piştgiriya jêhatiyên xwendekaran û pêşxistina şiyanên wan ên afirîner di warên curbecur de û di pêşxistina giyanê hevkariyê û xebata daîmî di navbera xwendekaran de ku dibe alîkar ku hawirdorek zanîngehê ya zindîtir û înteraktîftir biafirîne.

Festîvala ku îro di roja xwe ya duyemîn de hatibû li darxistin, bi gelek rêzeçalakiyên hunerî, çandî, werzîşî û kêf û xweşiyê dihewîne, berdewam kir. Her wiha van rêzeçalakiyên cihêreng de pêşbirkên cûrbecûr, pêşangehên hunerî yên ji hêla xwendekaran ve hatine amadekirin, performansên muzîk û helbestî, pêşangehên mîratî û çalakiyên ciwanan hebûn. Ev yek cihêrengiya çandî û zindîtiya xwendekarên zanîngehê nîşan da.

‘Em ji jiyan û azadiyê hez dikin’

Di çarçoveya festîvalê de xwendekara sala yekemîn a beşa Wergerê ya Zimanê Kurdî, Îngilîzî Sara Mihemed destnîşan kir ku armanc bi festîvala biharê ya 4’emîn ew e ku xwendekar xwendin û zanebûna xwe bi pêş bixin û wiha got: “Da ku mirov çand û exlaqê xwe nas bike pêwîst dike ku festîvalên wiha bên lidarxistin. Her wiha li her deverê jî em çand û zimanê xwe bidin nasîn. Em weke gelê Kurd ji jiyan û azadiyê hez dikin. Jiyana xwe bi rengê biharê dixemilînin. Mixabin dijminên gelê Kurd her dem xwestin gel di tarîtiyê de bihêle.”

‘Dewlemendiya bernameya festîvalê dewlemendiya çand û jiyanê ye’ 

Xwendekar Sara diyar kir ku ev yekem festîval e beşdar dibe û wiha domand: “Em bi çalakî, performans û pêşangehên cihêreng beşdarî festîvalê bûn. Ji ber ku dewlemendiya bernameya festîvalê, dewlemendiya çand û jiyanê nîşan dide. Sara di dawiyê de ji xwendekaran xwest bi ruhê ciwanî beşdarî xwendin, tevahî beşên zanîn û jiyanê bibin.”

Festîvala Biharê ya 4’emîn a Zanîngeha Rojava bi xelatkirina beşdaran û gerandina govendên gelêrî bi dawî bû.